पुणे : माणसाचा चेहरा प्रसन्न असला, की समोरच्यावर प्रभाव पाडण्याचे अर्धे-अधिक काम होऊन जाते. ही प्रसन्नता मनावर अवलंबून असते हे खरेच; पण बाह्य सौंदर्याचा विचार करायचा झाल्यास या प्रसन्नतेत सर्वांत महत्त्वाची भूमिका बजावतात ते सुंदर दात. दात सुंदर आणि निरोगी राखण्यासाठी, तसेच संपूर्ण मौखिक आरोग्यच चांगले राखण्यासाठी काय काळजी घेणे आवश्यक आहे, याची माहिती देणारे इंग्रजी पुस्तक पुण्यातील डॉ. भक्ती दातार यांनी लिहिले आहे. ‘से चीज’ असे त्या पुस्तकाचे नाव असून, बुकगंगा पब्लिकेशन्सतर्फे ते प्रकाशित होत आहे. आठ मार्च रोजी सायंकाळी पुण्यात त्याचा प्रकाशन सोहळा होणार आहे.
डॉ. भक्ती दातार या सामाजिक व प्रतिबंधात्मक दंत आरोग्य या विषयासह दंतशल्यचिकित्सेच्या तज्ज्ञ आहेत. सर्व वयोगटांतील व्यक्तींसाठी मौखिक आरोग्यासंदर्भातील जागृती करण्याच्या हेतूने त्यांनी ‘से चीज’ हे पुस्तक लिहिले आहे. तसेच, दंत आणि मौखिक आरोग्यात बाधा आणणाऱ्या गोष्टींना प्रतिबंध करण्यासंदर्भातील मार्गदर्शनही त्यांनी या पुस्तकात केले आहे.
ज्येष्ठ ओरल-मॅक्सिलो फेशियल सर्जन डॉ. दीपक कुलकर्णी यांच्या अध्यक्षतेखाली या पुस्तकाचा प्रकाशन सोहळा होणार आहे. ज्येष्ठ स्त्रीरोगतज्ज्ञ डॉ. वैजयंती खानविलकर कार्यक्रमाला प्रमुख पाहुण्या म्हणून उपस्थित राहणार आहेत. डॉ. जयंत नवरंगे आणि डॉ. विजय फडके यांचीही विशेष उपस्थिती या वेळी असेल. या पुस्तकाच्या ई-बुकचेही अनावरण या कार्यक्रमात होणार आहे. रविवारी, आठ मार्च २०२० रोजी सायंकाळी साडेपाच वाजता टिळक रोडवरील डॉ. नितू मांडके आयएमए हाउसमधील डॉ. संचेती सभागृहात हा सोहळा होणार आहे.
या कार्यक्रमाला आवर्जून उपस्थित राहावे, असे आवाहन ‘बुकगंगा’चे संस्थापक मंदार जोगळेकर, संचालिका सुप्रिया लिमये, तसेच लेखिका डॉ. भक्ती दातार आणि डॉ. समीर दातार यांनी केले आहे.